Categories

7 au hasard 30 avril 2014 : Mode à Bourbon : les élégantes té kass larmoir ! - 25 octobre 2016 : Quand les journalistes ont le tutoiement sélectif - 3 décembre 2014 : La collection de Christian va-t-elle finir dans les poubelles de l’histoire ? - 7 mai 2013 : L’Esperanza au Port - 18 juillet 2014 : Crash : « deux chasseurs ukrainiens » derrière l’avion abattu ? - 26 novembre 2013 : « Free Gandia » réclament les Rastas - 11 juillet 2016 : Haute couture : la Chine, la Chine, la Chine... - 18 février 2014 : Un prix Nobel accuse les États-Unis - 14 octobre 2017 : La reine Betty, l’une des plus belles femmes qu’on pût voir - 26 janvier 2014 : Lycées et collèges : grande grève annoncée demain matin -

Accueil > La Réunion > Economie et société > Lao : Na zarboutan dann ron mon zanfan !

Opinion

Lao : Na zarboutan dann ron mon zanfan !

4 décembre 2018
Lao
fontsizedown
fontsizeup
Enregistrer au format PDF
Version imprimable de cet article Version imprimable

Sa lèr lévé bayoun ! • Konmsi mon kèr la rèt rouvèr • Kat débordman d’kèr ranpli lamizèr • Pou ankès lam lamèr siklone • Pou sèy ras in libèrté • Pou ni in Moun sarzé sanm Solèy...

Lonbraz-la la fine désot lamèr..
Variation sur une œuvre de Guillaume Vogels.

Sa lèr lévé bayoun !


Mé-Kal, kélèr wi di ?
Sa lèr lévé bayoun !
Pou gèt longèr solèy-la, lonbraz-la la fine désot lamèr..

Mé-Kal, na ankor dézord déor ?
Na zarboutan dann ron mon zanfan !
Pou bat lalang péy-la, pou démar zamar zot pyédkèr lafine zone..

Mé-Kal, nora manzé zordi ?
Nora sak i rès mon zorkri !
In bout inn, èk in bout lot, pou anpar lazourné talèr..

Lèv aou astèr..

Wi Mémé, m’a pou lévé la
Zis lotan kas kangrinn pou pli mon kor, apré m’a ni koté fwayé kafé
Pou rakont aou mon rèv lanwit..

M’a ni koté fwayé kafé /
Pou rakont aou mon rèv lanwit..

Konmsi mon kèr la rèt rouvèr


Mé-kal, ou koné..
Yéroswar konmsi mon kèr la rèt rouvèr
Ali sanm mon léspri la ral vavang ansanm, inn pou gonn lot, tansyon té fébli
Navé d’mékont an paké, koman zépi fané si largamas pou lasézon
Navé ralé-pousé séryé, navé frontri, navé tangaz dann lo viré-tourné 

Wa di té koman tégor dann bal-maron, ousa latèt té pou di non kan lokor té pou souké

Mé-Kal, ou koné, konmsi mon rèv té pou-d’vré..

M’i rowa, Zanine, Amwin sanm Dada, dobout si tabliyé vespa-la, pou anval lafimé lalwa

Larout té fine an ravine, forstan navé galé déboulé dopi ranpar lamin zouvriyé

Ousa pasé, in sèl somin pou ginÿ travèrs ziska lakaz, san tonm dann fé Simca saviré si borkoté
Lodèr lavapèr té dann mon trou-d’né Mé-Kal

Té koman lamor pou kour dann touf sinpol par karo si zavan kalbasyé

Gro pléré Monmon kan nou larivé..

Kat débordman d’kèr ranpli lamizèr


Nadfwa m’i té san m’i té tranm Mémé
Akoz gro pléré Monmon kan nou larivé, son sagrin sitantèlman té si d‘fé
Akoz bann kador oprésé té kour kasyèt dann fon kanal, sansa déryèr lanbordir bordé kann
Nadfwa m’i té ansézi Mémé

Sakfwa léko lavil té fé robonm laklos krimozinn-la ziska mon koko pozé
Sakfwa m’i té wa ou lévé, pou mazine sanm out saplé kèl koté zoryé i fé dor Bondyé

Mé 73, févriyé 91, désanm 92, févriyé 12..
Kat bèzman dann lakour-Patèl, lakrwazé zonbri ti-kolon, kiswa travayèr, béklèr-d’klé, somèr atitré
Kat débordman d’kèr ranpli lamizèr, lavévé zot i vé rasé, zot i vé arkilé
Kat désounaz dévèrsé dann somin sitantèlman lakaz té plin
Kat tranmman-d’tèr, koman volkan i savir lalav si lapant, kiswa filao, flèr, sansa lamèr
Kat sézon pou trwa zénérasyon vintan i vé avine dovan, démaliz sigid, dékay losan

Koman volkan i savir lalav si lapant..

Pou ankès lam lamèr siklone


Na dézord pou-d’vré vréman

Lo pé d’lâm anglasé dovan saroyaz langété, zinnzan, séèrès, tout an misouk, anbarikadé

Na tout kalité rézoneman ladan, tout ladi-lafé, wati-watyé galmaté lonèr, galfaté lafirté
Tout lopé ranpli sanm zot mounité, zot doulèr ramasé

Na lokont pou vanzé, arvanzé, akoz gro-pléré lotkou la anvalé

Na lamor an tiktik dann kwin i vèy, na zétwal pou filé an koma kabosé

Mé-kal, ou koné tousala
Karo péyi-la défwa, wa di son kor lé né pou brilé, san karinm, san dolé pou béni son tizon-d’pyé
Wa di son kot pou ankès lam lamèr siklone la séré ziskatan lozyé la pèté sanm in zékli d’van salé
Wa di son bouzaron an mok malanbaré dann révolisyon, akoz son larson té pyondindé

Wa di son zanfan, pankor fini tir dolé dann tété, lé pliyé, ravazé, sanm lamour zot i rod anparé
Wa di sa in térin malézé, ousa groblan-la pou kontinyé kolonizé, méné si méné

Na zarboutan dann ron mon zanfan !

Pou sèy ras in libèrté


Swasant-douz-an départmantalité sétané
Swasant-douz-an bagou pou toy lamoulir lavarang angansé
Ousa ti-pwason-la dann bokal i rod pou aprann nazé

Swasant-douz-an, ousa son badri anséré sou somiz i aspèr volvolé
Pou trikot in siyon sanm fangok son pépé la fé kado avan alé

Robélyon, saminm défwa wi vé di
Mé sabouk-la i fyak pou rodrès lopé (bann pa kapab war lamin i done azot manzé)
Akoz ryink saminm zot i koné, saboulé, déboulé, apropté, fout blaké
Pou lizine, pou karousèl manzé i fé tourn latèt bann fé-folé
Pou tapi déroulé sou larou anzolivé, kinmsa galé sanm lamèr i ginÿ arpi anparé
Akoz azot minm Granmèt konsésyoné, i fane kontromèt dann lanvolop zélèksyon-ansouké

Mé-Kal
Aou, amwin, n’i koné na batay dann lilèt-la dopi tan-p’ti
N’i koné dopi dovan lotèl lanvizazaz Abèl sanm Kain dann zot kotri-konté
Akoz-samin somanké mon rèv lanwit-la i fini pa ravaz tout toulézour m’i lèv
Gèt aou, koman zordi ankor, karant-sink-an apré

Domoun an poundyak, koman lisyol ankosté pou sèy ras in libèrté

Kansa nora larényon dann nout rondisman Mé-Kal ?

Kafé fine sofé..

Pou ni in Moun sarzé sanm Solèy


Alé, lèv aou mon zanfan, kafé fine sofé

Ou lapou ronf si mon zépol dopi lèr, out grandèr..

Mèt out zilé
Labézwin fondasyon dann fon-la
É akout byin kosa Mémé i di aou
Fouzèr i mont lopwin son Monmon lapa in zanfan an foutan

Li pou aprann énèt 

Bli pa, pa bézwin kasé-brizé pou ni in Moun sarzé sanm Solèy

Lao
« San zone », 25 novanm 2018

A lire aussi :

Partager

Réagissez à cet article

comments powered by Disqus

Abonnez-vous à la Newsletter

Image Newsletter