Categories

7 au hasard 16 août 2013 : 7 Lames la Mer persiste et signe : cette maison n’existe plus ! - 13 août 2014 : Mafia : un sanctuaire dans l’océan Indien - 27 mars 2017 : Un fabuleux laboratoire pour vos idées de génie - 1er mars : Esclaves jusqu’à la mort de leur « maîtresse »... - 24 août 2014 : La Réunion Alcatraz - 7 décembre 2014 : Mexique : un paysan de 21 ans s’immole par le feu - 2 août : Le paquebot « Jean Laborde » repose dans l’océan Indien - 4 mars 2015 : Paul Vergès : 90 ans... « Somin granbwa sa lé long ! » - 11 juillet 2014 : « Stop the war against Palestinian people ! » - 4 mai 2014 : Entrez dans la médiathèque Cimendef ! -

Accueil > Domin lé dan nout dé min > 7 écrit ici > Zot sel tristès té la mor...

Salazie

Zot sel tristès té la mor...

23 octobre 2013
Sully Fontaine
fontsizedown
fontsizeup
Enregistrer au format PDF
Version imprimable de cet article Version imprimable

In fonnkèr pou di nout gayar. Pou amont ban’na kosa i vé dir marsh dann kèr nout péï. Kan pou mié war, i fo ou fèrm le zié... Mersi Sully.
7 Lames la Mer

L’matin konm le swar in shiyn i aboy...
Rivière du Mât
(Aquarelle de Jean-Joseph Patu de Rosemont, mai 1813)

Soléy i lév...
Férm le zié po mié war …
Maï i pous dan léo …
In mét par mené, in pe partou lé semé...
Dan lér la fumé i mont...

É...
L’matin konm le swar In shiyn i aboy...
Tanzantan in kok...
La nuit konm Le jour i véy, i véy minm...

É la nu mont, é la nu grinp...
Do mounn i sort’ dann’ rosh...
La piosh i kony... i kony minm...
La min i fouy dann’ posh...
Na inn’ i pérs sitron...
Le ronm i koul... i koul minm...
O goulo...
Si an o…
Soléy i mont, dousman...
Transpirasyon i d’sann dann’ pié d’kou...
Koul an kanal...

Dann’ lér midi nu repar...
Alor nu kit zot kouraj,
Nu dépas le bor, lot koté lébouli...
Pié kafé i d’bout’ su la oter...
Nu marsh a lonb aster...
Dwat’ pyé i débord su parsyat’...
Lér lé dou...
Le syél lé pur...
Férm lo zye marmay... ékout !..
Antann lo dan karo banan’...
Ékout’ le van dann’ fey...
Santyé ouvér dann foujér... na ankor la rosé...

Domoun lontan té viv isi... Té abit la, koté la sours...
Habitation Nellet près de la Source, Salazie
(Lithographie de Louis Antoine Roussin, 1880)


Nu shanj vérsan, an pant dann’ranfonsman...
In lanklo i anbar shemin...
Domoun lontan té viv isi...
Té abit la, koté la sours...
Vétivér té an touf
Byin ranjé...
Sa...
Lontan...
Partou té planté
Mang, sapot’, zavoka…
Jak dur...

Na in bat’man’ zél...
(Photo Gabriel Blanc)

Brouyar i avans dann’ ranpar...
Le tan i kouv...
Dan nout do in ti van fré...
La plui i anons...
É nu majine é nu san...
Loder kafé gryé...
Le linj’ su’d rosh po séshé...
Ékout ankor... moulin i mounn...
I mounn minm...
Zot tout’ lé a lonb...
Partou lé kultivé...
Na in bat’man’ zél...
Bann ramyé…
I poz su filao...
Bann bélyé...
I fé tranm la bransh...
Koshon i ronf…
I ronf minm...
Marmay i kour...
Dousman i grandi...
Plin’ d’fors...
Mé dousman minm…
Lodér sharbon dann fér i mont...
In vyé radio i trouv pu la born...
I ronf, i ronf minm...
De fami té viv la...
Tanzantan té la fét...
Lamour, lajwa dann kor…
Zot sel tristès té la mor...

Brouyar i avans dann’ ranpar... Le tan i kouv... Dan nout do in ti van fré...
Les rampes de la savane, route de Salazie, près de la marre à Poules-d’eau
(Lithographie Louis Antoine Roussin)

Salazi la nuit i tonb...
Anchain i asonbri...
Dousman...
Mé dousman minm…
La piosh i kony pu...
Ryink lo shyin, le kok i kontinu...
La fumé i mont ankor...
E nu san le kor i bouj,
E nu san le ker i tranm’…
Konm zangi dan la sann’,
É le san su la twal…
Le tan i vwal, i anbal…

Nu san loder la mous...
Lodeur lékors mouyé...
In farin’ i ariv...
La minm, su d’rosh…
Na d’trou,
Ék lo d’dan...
Jus bon po avalé...
Otour i fé nwar...
Regard’ le syél po trouv la klérté...

Nu travérs la mar... Lodér shoka krazé i repous’ sat kasia...
Mare à Poules-d’eau
(Lithographie Louis Antoine Roussin)

Le syél…
La, su Salazie,
Aster,
Lé an koulwar...
É nou lé la, dann’ broussay’,
Po ékout le swar...
Tout i anbal, i bouj...
I sa vit’...

Nu coup l’étan...
Nu travérs la mar...
Lodér shoka krazé i repous’ sat kasia...
Nu travérs le tan...
La rivièr a sék...
La tér isi na in loder...
Dann jéraniom, in galé na pwin...

La tér lé lis osi...
É nu glis... nu glis...
Nu glis minm...
É kan nu glis pu nu roul...
Juska toush Hell-Bourg...

Pyé d’ van, tét an lér,
Jusko fé klér...
Juska ousa lo, an pant i dévérs...
Juska ousa lo i vwal,
Juska ousa lo i débord...
I débord minm...
Juska nway’ pwason...
Juska kouv sonj...
Dann karo kréson…

Soléy i lév su Salazie...
Férm lo zié, zot va war...

Sully Fontaine

Octobre 2013

A lire aussi :

Partager

Réagissez à cet article

comments powered by Disqus

Abonnez-vous à la Newsletter

Image Newsletter