Categories

7 au hasard 18 août 2013 : Avons-nous voté pour Merkel ou pour le changement maintenant ? - 23 février 2015 : « Une pensée pour la 1ère religion qui s’est pratiquée sur cette île » - 26 août 2014 : Zéro (Enzensberger) - 15 novembre 2015 : La lumière de « Zazakely Sambatra » tuée dans les attentats de Paris - 31 octobre 2016 : Un fait qui n’a rien de divers... - 30 septembre 2015 : Nouvelle route du Littoral : l’amateurisme au pouvoir - 1er février 2015 : Pierre Vergès : une pause mais pas la retraite ! - 17 septembre 2014 : Nouvelle Route du Littoral : le grand bluff de la com’ - 5 avril 2013 : L’étrange destin du portrait de Jules Hermann - 25 octobre 2016 : Quand les journalistes ont le tutoiement sélectif -

Accueil > Lames de fond > Zistoir dedan / Zistoir déor > Zordi na point de baleine

Zistoir dedan

Zordi na point de baleine

3 janvier 2013
Jean-Claude Legros
fontsizedown
fontsizeup
Enregistrer au format PDF
Version imprimable de cet article Version imprimable
  Sommaire  

Zistoire Grand-Père Kal... Qui sa la raconte amoin zistoire-là, mi connaît pu. Moin la fine oublié. Quand sa sa ? Mi connaît pu. Moin la fine oublié. Mais moin lé sûr té in zistoire Gulliver. Gulliver ! Zot i connaît qui-sa i lé Gulliver ! Le bougue la parti dann pays Liliputien, bann ti moune, moune ti-guiguine. Bin, Gulliver la fait in bon peu de voyage. Et in jour li la débarque su inn île, de moune i dit té la Réunion.

JPEG - 95.1 ko
Gulliver la fait in bon peu de voyage. Et in jour li la débarque su inn île, de moune i dit té la Réunion.

 1

Qui sa la raconte amoin zistoire-là, mi connaît pu. Moin la fine oublié. Quand sa sa ? Mi connaît pu. Moin la fine oublié. Mais moin lé sûr té in zistoire Gulliver. Gulliver ! Zot i connaît qui-sa i lé Gulliver !

Le bougue la parti dann pays Liliputien, bann ti moune, moune ti-guiguine. Bin, Gulliver la fait in bon peu de voyage. Et in jour li la débarque su inn île, de moune i dit té la Réunion. Mais la Réunion dann temps longtemps, longtemps-longtemps même. Daoir dann temps le pays té i appelle Gondwana. De moune i dit comme-sa la Réunion té inn île déserte. Mais qui i connaît vraiment ? Zot té là, zot, sa qui dit sa ?

En tous-les- cas, d’après Gulliver, dann temps longtemps, la Réunion té habité. Té in paradis, in paradis pou de bon : navé rien que vieux moune ! De moune té i vive longtemps, longtemps même. Et toute ce bann gramoune té heureux. Zot té tellement heureux, zot té veut vive encore plus vieux ! Et navé rien qu’inn manière pou vive encore plus vieux, té i faut zot i économise zot souffe. Et pou économise zot souffe, navé rien qu’inn manière : arrête causé ! Na in vieux fanm la dit :

— Marmaille (li té dit marmaille, malgré zot té de gramoune), marmaille, ma dit azot inn affaire, NI CAUSE TROP !
Bin zot i oit, pou moin, rien que sa-même n’assez pou prouvé que sa té bien la Réunion : de moune té i cause trop ! Le vieux fanm la répété :
— NI CAUSE TROP ! Moin mi dit : allons arrête causé, nous va économise note souffe. Comme sa, nous va gaingne vive encore plus vieux.
In gramoune la lève la main :
— Mais vi perde la tête, ma fille ! Si ni cause pu, comment nous va fait pou comprann anous, quand nous nora inn affaire pou dire ?
Personne la pu dit rien. Inn heure de temps la passé. In moment, na inn ote gramoune la levé pou causé :
— Moin la magine inn affaire. Si, au lieu de causé, nous té remplace chaque mot par le zaffaire que li veut dire ? Nous noré pu besoin de causé. Le zaffaire va cause pou nous.
— Mais quel qualité de zaffaire ou l’après causé ? na inn la demandé.
Le gramoune la espliqué :
— Sa que mi veut dire, au lieu que ni dit le mot, bin ni trape le zaffaire en vrai. Ma prann in l’exempe : si mi veut dire « soulier », plutôt que mi dit soulier, ma trape le soulier pou monte azot. Et zot va comprann que mi veut dire soulier. Comme-sa, ma économise mon souffe, et ma vive plus longtemps.
— Si mi comprend bien, in vieux fanm la dit, si mi veut dire « mangue », mi trape inn mangue et mi monte azot. Bin sa lé bien, sa, mais où-sa mi sar trouve toute le zaffaire moin nora pou dire ?

JPEG - 24.6 ko
Si ni veut dire « baleine », bin ni trape inn ti baleine en plastique.

 2


— Bin sa lé simpe, na inn la réponn, i suffit que ni marche sanm in grand goni, et ni mette dedans toute le zaffaire nous na pou dire : bouteille, la sabe, piment, n’importe de quoi ! Ni veut dire « bouteille », bin ni trape inn bouteille dann goni. Ni veut dire « piment », bin ni trape in piment dann goni. Ni veut dire la « sabe », bin ni trape inn poignée la sabe dann goni. Comme sa, nous la pu besoin de causé. Ni économise note souffe, et ni vive encore plus vieux.
Toute la bann la trouve sa gaillard. La point inn la demandé, si porte le goni su zot zépaule, serait pas plus fatigant qu’in causement (même si zot té i traîne le goni à terre !) Non, toute de moune la trouve sa vraiment gaillard et zot la commence coude in paquet de goni.

JPEG - 34.4 ko

Zot té fine bien avancé dans zot travail, quand na inn la pose son zaiguille, pou dit :
— Oui, lé bien gaillard toute-sa-là, mais marmaille, si mi oit inn baleine dans la mer, comment mi sar dire azot sa ? Mi peut pas tire inn baleine dans mon goni !
— Sa lé vrai, la dit inn ote, plus forte raison si mi veut dire na douze baleine dans la mer !
Toute la bann la pu dit rien, zot la resse en tas. Personne té i coude pu. Alors premier fanm lavé causé, l’ardeboute in coup, elle la dit :
— Bin sa lé facile sa, i suffit nous mette bann ti zobjet miniature dans note goni. Comme sa, si ni veut dire « baleine », bin ni trape inn ti baleine en plastique.
Toute de moune té content, zot l’arcommence coude zot goni. Mais na inn ote la levé, la dit :
— Lé vrai, ni peut mette in paquet de ti jouet en plastique dans note sac, mais quand même sa, na in problème : si in jour na point de baleine dans la mer, comment ma fait pou dit azot ? Si mi monte azot in goni vide, comment zot va comprann que sa i veut dire : zordi na point de baleine ?

Le causement la casse zot moral, toute la bann l’arrête coude et zot la pu causé. Navé inn affaire té i tracasse azot : où-sa toute le bann baleine la passé ?

A cause sa même coméla, quand zot i traverse dans zot l’auto, créole i passe zot temps veille baleine dans la mer. Et quand zot i oit inn, zot i tire inn ti baleine en plastique dans zot goni, pou monte toute de moune par la vite. Et toute de moune i arrête pou guette le baleine : à cause sa même i fait l’embouteillage !

N’empêche, la pas pou sa créole l’arrête causé : toute la journée zot i cause, zot i cause, même quand zot la point rien pou dire ! Ecoute la radio, zot va entann !

Jean-Claude Legros

A lire aussi :

Partager

Réagissez à cet article

comments powered by Disqus

Abonnez-vous à la Newsletter

Image Newsletter